Ka lungsim hon kam mahmah Tulai Thuchin Thutang tuamtuamte lak ah hiaite I news tungtawn in ka hon kum hi. Simtuten bang chin nangai uhiam.
I. Gospel centenary toh kisai: I omna Churachandpur District a Pasian Thu, Gospel hong lutna tukum 2010 in kumza chingta hi. Hiai Gospel Centenary lopnang in Saptuam (Denomination) teng kigawma Gospel Centenary lopna thupitak May 5-7, 2010 sung neih ding chih thusawm a nei in Celebration Committee March 25,2006 in naphut kheta uhi. Huai Committee vaipau dingin Heutute Upa L.S. Gangte Chairman dia guangin Rev. Lalrosiem Songate Secretary dia guan a om in, aseppih ding uh committee member bangzah hiamte tawh pan honlata uhi. Huai ading in a team work bang in Saptuam tuamtuam ah Motivation bangzong hong paikhinta uhi. Hiai Celebration Committee te makaihna a district sung a Saptuam om tengin munkhat a neihkhawm ding chi a kithukim in thugentu ding leh Resource Person tanpha sehsa in omkhinta hi.Huchih lain, Hmar Community Saptuamte apan in hiai Gospel Centenary lopnaFebruary 4-7, 2010 sung thupitakin nei zouta uhi. Thadou-kuki Community a Saptuamten February 11-14, 2010 sung mah in hiai Centenary lopna nasetakin neizou nawnta uhi. Vaiphei Community apan in ECCI nuai a om mah EOC ten Lingsiphai ah nasetak mah in February 16-17, 2010 sung Centenary lopna neizou nawn uhi. EOC Mizoram Presbyterian zomten zong Feb. I6 -9, 20I0 sung Phaipheng khua, Thanlon Sub-division sung ah Gospel Centenary na lawm zou nawnta uhi. Hiaite banah February 19-20, 2010 in Reformed Presbyterianten Saikot ah Centenary lopna neita uhi. Paite Community apan in EBC ten April 29 – May 2, 2010 sung Mission khawmpi lian leh Centenary lopna Programme Lamka tung EBC Biakin a neih ding sawm lel uhi. Huchi vengvung dana apaitouh zel leh May 5-7, 2010 chianga Saptuam kigawma Gospel Centenary lopding kisawmpen alawhchin ding banga lawhching zoulou ding hileh hong kilawmta hi. Unau Hmar Community lamte bel Churachandpur adia Kritianna lama ana madawk zawdeuh ahihna uah ama dawkna uh (advance) ahihna uh langsak nuam deuh hikha thei uhi.. Pu L.S. Gangte leh Pu Rev. Dr. Lalrosiem te makaiha Centenary lopding pen avaihawmte chitlouhna om hia, amau makaihna nuai ah utkeng chihna ahi diam, hichi banga advance tak a hong kizat sauhsauh mawk! Tua programme hun tunma a bangzah in hihlai ding? Ainou (crab) tunkhelh banga Saptuamte om sauhsauh maiding maw bang chidan ahia?Bang teng hileh I gam a Gospel , hong tunlai a, anam anam a hong kikhenzaka namkhat sunga zong pawl tuamtuam a hong kikhen nen, tua kikhenna KHA (spirit) mah in Centenary tungtawn maha na hongsem nawn hia le? Thil omdan vengvung amhaih huai, theihsiam huailou hong bangta ahih man in, mipite thil omdan hilhchiana akisaipih lamte kua hiam in Gospel Centenary tungtang news leh Media tungtawn in hilh chetna hon bawl theile uh uthuai petmah kasa hi. Gospel Centenary hilou a Divide and Rule Centenary Celebration I suahsak maimah ding lauhuai lua hi. Bangteng hileh mipi leh Government theih a Missionary Day bel May 7 kumteng in hizela, Holiday apuan ahi. A Day zang hiloua, a Centenary Year zang ihita zongin akigawma neih isawmpen, neikhawm masa phot thei leng, kilawm in khamithuai zaw deuh louding hiam chinuam hisam veng aw. Gospel Diamond Jubilee zatlai a Gospel honglut hun ani, akha genlehsak dang omlou napi Centenary hun hong tun leh ani, akha bang I gendan tuamtuam hong kigen vengvung mawka, bang chidan ahia le?
II. Community Hall leh Organization Hall: Khua leh Vengsung khat a om chiangin, mipite kikhopkhwm theih nang Community Hall poimawh mahmah hi. Government in leng hiai bang Hall poimawh ngaih in ahi theitan in tua bang mipi kikhop khawm nang Government lam apan I MLA, Minister leh MP ten hongpia in kilam zeel a, nuamtuam mahmah hi. Himahleh, hiai tawh kisai in kupnop kanei hi. Nambing Social Organization/Association tuamtuam mina, YPA Hall, CYA Hall, ZYO Hall leh adangdanga, kibawlte himhim kisutawp vek thei in, New Lamka Community Hall, New Lamka (G) Community Hall, Chengkon Community Hall, Simveng Community Hall, Rengkai Community Hall, Hmuiaveng Community Hall chihte in kikheng vek thei leh, a it guigui iom thamnadia kum tamlou nungin, agah khum a hongom baih zaw ding hi. I MLA, Minister leh Government lama Development Fundte himhim zong Tribe Organization/Association mina Hall bawl nanga panpihna piaknawn louh a venglehkhua Community Hall min a piak hileh, amau adin leng anuam dia mipite adingin leng ahoih zaw ding hi. Vengkhat a tampen namte zong vengdang khat ah minority group hitheizel hi. Community Hall chileng, Iveng-ikhua a community omteng kikop theih hipahdia, I intekna hong hi chiat ding hi. Unau Thadou-Kuki lamten hiai tawh kisai in hih hoih uhi. Bizang Community Hall Tuibuang Community Hall achi ua, Bizang leh Tuibuang a namteng Hall ahimai hi. I society iveng ah mi tuamtuam teng khawm a, dialdial-diamdiam I utleh nambing hall min sukbei a, venglehkhua min Community Hall hisak vek theita leng-kipumkhatna kalbi khat a suakpah lian ding hi.
LEMTHU LENG HILOUA LEMNA LENG SAK DING IN.
III. Taksapna leh Hamphatna Kibang a Omsakna(Equal Need & Equal Opportunity): I omna District sunga teng pau tuamtuam namneu(Tribe) tuamtuam tengkhawm, lungsim kimu pailet leh lungsim kawchik mahmah ngen tengkhawmte ihi. Huchi ahih man in akua peuh in kou nam in tan hampha teng tangin, neekding teng ne in, ikianga ten ngawl in hong tung etden le-uh chih lungsim I puachiat lai un alang hi. Huchi bang lungput puami ihih laiman un, ilak ah lemthu bekbek lengin, alemna taktak lengthei nailou abang hi. Aziak ahih leh, ilungput uah, amau ngawlin, en neleng chihna atam laiziak ahi hi. Laisiangthou Felippi 2:4 ah, “Noute laka kuapeuh in ama hoihna ding kia enlou in, midangte hoihna dingzong ensam hen” chih thupi in kuapeuh in neiin zang leng, lemthu hilou in lemna om ding a, Vangam malep district I suak ding uhi. Israel leh Palestinete kalah, lemthu alenglenga, lemna aleng ngei nailou tawh kibanga om a ut huai nawn kei hi.Churachandpur a tengte lak ah Hmar, Thadou-Kuki leh Paite chih khawng anam tamzawdeuh tengkhawmte ihi uhi. Bang hiam thilhoih kitaitehna ineih ding bel ahoih ahi. Ahi zongin, hiai nam thumte, kital kisiangsak deuh in tan hampha teng kou tangvek in adangten tanglou in ngawl uhenla, tua pansan in ki nuaisiah in, Dominant Tribe dan in ki-omleh chih lungsim pawchiat hileng kilawm kasa hi. Tuabang ahih louhna ding in, tan kikim, neih kikim leh taksapdan kibang in om leng, Geometry isinna ua, “They are equal in all respect” achih bangin om leng kituahna, kilemna om den ngeingei ding hi.Huchi bang a hong om theih na dingin, Lamka North Tuibuang lam a Government mun poimawhte, Office omsate ahizah in omden henla, a hong omlai dingte Lamka South (Thingkangphai & Tangnuam) lam, Lamka West (Head Quarters Veng leh Tuinom) lam ah, Lamka East (Rengkai-Saikot) lam ah thuneitute leh nam heutu ten apoimawhna kibang in hong koih le-uh uthuai mahmah hi. Thunei thupai tang chi in, Eimah milehsa te omna veng leh khua lamkia a, alik-abak (avekpi a) koihvek I ut chiatna mahmah un, ki mituam etna, kituahlouhna leh kilang etna piangsak den hi. Lemthu gengen lou in, Lemna lampi muh chiansa zui in thuneituten hong sem le-uh, Lemna bawlte a hampha uh, Pasian tate chi a ki min lawh ding uh a, Azahngaite amau tunga Pasian zahngai ding ahih man in.Tua ahih man in imi isate leh I district mipite, Pasian tate leh Pasian zahngaihna tang mite isuahna diungun, Nam heutu leh thil bawl theiten, hiai bang lungput, tupleh ngim in hong neile uh, Lemthu hilou in Lemna leng takpi ding hi. Huai ziakin, I district sunga tribe tuamtuamte luahna leh tennate ah, tan kikim hamphatna kibang leh taksap kibangin koih in omleh, lemna detdou imupah ding hi.Lungkham keini, tu hun a I en mahmah gam khangtou leh nitum senglou a vai ana hawm ngei England, Britishte zong, mellehpuam kibang, ei banga pau neu chikchik a kibanglou, Essex, Sussex, Britons, Saxons te zong AD 300-600 hunlai in selfish tak chiat in na om ua, na ki hua in na kidou tuah nilouh uhi. Ahizongin hun hongpai touzel in, pilna hong nei semsem ua, alungput uh honglian hiai hiai in namkhat paukhat in hong om ua, England, English hong piangin Kumpi thahat, Pasian adia thukem leh leitung pumpi a Pasian thu a genzak tute in pang maimah uhi.Tu kum zabi 21 na sungah Pasian Khasiangthou in nisuahna gamlamte lak hong lengla, hong omta dinga, unau khat ihihna theinailoute hong kitheisak dia, na uplouh lai in Pasian mizat, nampi khat, hong hisak dia, nisuahna lam apan Leitung Pumpi, Jerusalem tan a a Tangthupha atangkou dingte leh, Leitung maikaiha agen-ahawm, Agatang khin minam in zong hongkoih ding hi. Nou, kou chihnate –Ei chiin Pasian in hon bawlsak leh ama a dingin haksa hetlou ding hi.
No comments:
Post a Comment